يعطي الفنان ريبال هنا نصائح لا بد منها تتعلق بالغناء على المسرح و غيرها من المعلومات المهمة جدا للغناء.

ريبال خضري:

"مرحبا، أنا ريبال من إعزف دوت كوم.

الدرس اليوم أعتقد إن كتار مهتمين فيه و كتار حابين يعرفوا تفاصيل عنه، اليوم بدنا نحكي عن معلومتين أساسيين، بدنا نحكي أخطاء شائعه حكينا كنا ابتدينا فيها بالدوره الماضيه أو بالكوس الماضي، هلأ بدنا نرجع نأكد على هاي الأخطاء الشائعه، إضافةً لهيك في بعض النصائح الكتير مهمه لحتى أنا لما بدي إطلع على حفله كيف إطلع على حفله بأفضل طاقتي بأفضل صوت أنا أمتلكه إقدر أقدم صوتي بشكل صح للعالم، أول نقطه بدي إحكيها من الأخطاء الشائعه كتير إن نغني بصوت عالي بالأماكن العامه.

هلأ مثلاً أنا ممكن أكون من بعض الأشخاص بيروحوا برحلات، مثلاً بعض المغنيين بيروحوا بيكون سفرهن ضمن سياره، فأثناء السياره ممكن يكون عم بيغني عم بيتدرب عم بيسمع أو ربما عم بيكون مثلاً مجموعة غروب أشخاص عم بيغنوا بيضطروا بهيك حاله إن هنن يغنوا بصوت عالي، هلأ شو السبب؟ السبب إن أي وسيلة نقل أي مكان عام راح يكون في ضجيج، فأنا لإسمع حالي راح أضطر إني أنا أعلي صوتي زياده، هلأ أنا بهيك حاله بكون عم بتعب حنجرتي و أنا مش حاسس عحالي، لإن عم بيبذل طاقه مضاعفه، فبوصل لوقت الحفل أو بوصل لوقت التدريب هيك بوصل إن أنا متعب صوتي بالكامل و بتعب صوتي بالكامل و مش عم بقدر أغني بشكل صح، كتير مهم ننتبه إن ما في مغني صح بيغني بمكان عام فيه ضجيج لإن مش راح يقدر يغني بشكل صح، إضافةً لهيك من الإشيا الكتير غلط إن إنتي لما بدك تغني تغني بس تكون عم بتحفظ الأغنيه تغنيها من صوت الحنجره، يعني مثلاً أنا بدي إحفظ قولي عملك إيه قلبي (يقرأ الأستاذ ريبال التمرين قراءة ايقاعية).

لأ عيد عيد بدي إرجع إسمع فبرجع بضل عم بعيد برجع بضل عم بعيد و أنا عم بغنيها من الحنجره،طيب أنا لبيل ما حفظتها بكون أرهقت حنجرتي، الحنجره هي المكان اللي أنا بغني فيه لما أنا أكون حافظ لما أنا أكون جهزت كل أموري لحتى أطرح أنا شو بدي أغني و أزبط العرب تبعي كيف بدي اياها تكون بأفضل شكل، بس مش بضل عم بغني منها طول الوقت لإن بالنهايه هي أساس عملي هي النقطه الحساسه بجسمي، فأنا لما بدي إحفظ (يقرأ الأستاذ ريبال التمرين قراءة ايقاعية).

بقدر إحفظ بصوت كتير واطي لحتى إتأكد إن اللحن صار بدماغي، قادر إني أنا أطبقه بحنجرتي بشكل صح مو إتعب حنجرتي، أيضاً من الأخطاء الكتير شائعه اللي هي الغناء الصباحي، مش صح إني أنا إستيقظ الصبح مباشرةً على بروفا أو على تمرين أو على درس أو إني حتى إني إحكي، في بعض المطربين المهمين بيقولوا إن هنن ما بيحكوا لقبل تلات ساعات من وقت ما يفيقوا، و هادا الإشي كتير صحي إن أنا إترك حنجرتي لإن الحنجره بتكون مرتاحه صارلها تمن ساعات بعيده عن الرطوبه بعيده عن الحركه مرتخيه الحبال الصوتيه مرتخيه، هلأ لما أنا بضطر إني أنا أشغل الحبال و هي مرتخيه راح تشتغل الحبال و راح تعطيني يمكن جزء كبير من اللي أنا بدي إياه بس راح تتعب بشكل أكبر راح يأدي هادا الإشي لبحه صوتيه ربما شوي شوي تستمر يمكن بعد فتره تصير بحه مزمنه، الغناء الصباحي غناء كتير خاطئ حتى و إن كنت تمتلك القدره على ذلك، يفضل إن على الأقل ساعه لساعتين ترتاح، يفضل يكون في مشروب دافئ خالي من الكافيين، يفضل يكون في ماء دافئ لما إنتي بدك تستيقظ صباحاً، بدي إحكي كمان عن أثناء ما أنا بدي إرتجل ضروري كتير إني إتذكر إن الإرتجال لازم يبتدي بنفس المقام و ينتهي بنفس المقام، يعني ما بيصير إني أنا إرتجل على كيفي ضل عم برتجل ضل عم برتجل لأروح لمقامات كتير بعدين ألاقي حالي على غفله أنا وين بدي إرجع؟ سبيل المثال الإرتجالات اللي ممكن البعض يعملها على أغنية عللي غرى، المقطع الأخير لما عم بقول (يقرأ الأستاذ ريبال التمرين قراءة ايقاعية)، فيي إرتجل (يقرأ الأستاذ ريبال التمرين قراءة ايقاعية)، رحت للحجاز (يقرأ الأستاذ ريبال التمرين قراءة ايقاعية)، رحت للبيات (يقرأ الأستاذ ريبال التمرين قراءة ايقاعية)، رجعت للهزام (يقرأ الأستاذ ريبال التمرين قراءة ايقاعية).

أنا بدي إرجع لنفس المكان اللي أنا ابتديت منه، هادا الإشي ما راح ييجي بيوم أو بتنين أو بتلاته، لهالشي نصيحه للأشخاص ياللي بدهن يرتجلوا إما إن هنن يرتجلوا إرتجالات بسيطه ببداية حياتهن الفنيه، ما يفوتوا بمقامات كتير و مقامات معقده، لإن إنك تفوت بمقام معقد و تطربني ربع ساعه بعدين بعد ما تطربني ترجعني لمقام غير المقام الأساسي فهون إنتي بتكون خربت كل شي، بتكون خليتني أشوفك مغني مش شاطر، لأ الأفضل تخليك عنفس المقام و تلعب عليه و تحس أكتر بالمقام، و يمكن إذا بدك تروح لمقام بسيط قريب منه على إنك تروح لستين ألف مقام بعدين ما تقدر ترجع للمقام الأساسي."